Kaminuza y’ubushakashatsi ya Johns Hopkins ivuga ko abanduye coronavirus ku isi uyu munsi kuwa kabiri barenze miliyoni umunani (8) mu gihe abo imaze kwica ari 437,137.
Mu Rwanda mu minsi irindwi ishize habonetse abarwayi bashya banduye coronavirus 161, bituma leta itangaza ko iri gusuzuma niba hatasubizwaho ingamba zikomeye zo kwirinda zari zarafahwe mbere.
Mu Burundi, leta ejo kuwa mbere yatangaje ko habonetse abantu bashya 10 bayanduye, imibare yose hamwe muri iki gihugu imaze kuba 104, hamaze gufatwa ibipimo birenga gato 1,000 nk’uko biboneka mu bitangazwa na ministeri y’ubuzima.
Mu Burundi, nta ngamba zigaragaza zikomeye zafashwe mu kwirinda ikwirakwira ry’iki cyorezo. Mu gihe muri Tanzania ho Magufuli yategetse ko ibikorwa byari byafunzwe bifungurwa.
Muri Nigeria habarwa abantu barenga 16,000 banduye coronavirus.
Minisitiri w’ubuzima w’iki gihugu yabwiye abanyamakuru ati” iki cyorezo tuzabana nacyo igihe kirekire kandi tuzagenda twiga uko iminsi igenda iza”.
