Abicwa na Coronavirus mu Burundi bakomeje kwiyongera n’ubwo Leta y’Uburundi idatangaza ko abo bapfa bahitanwa na Coronavirus.
Leta iherutse gutangaza abantu 40 bashya banduye icyorezo cya Coronavirus. Kugeza ubu imibare y’abanduye itangwa n’abayobozi b’u Burundi yose hamwe ni ni 144. ikaba ari- imibare itangazwa mu gihe imiryango itari mike mu Burundi ikomeje kuvuga ko abantu bayo bakomeje kwicwa n’iki cyorezo ariko Leta ntibabarure mu bishwe na Coronavirus .
Imwe muri gihamya igaragaza ko ibivugwa n’abaturage ari ukuri ni umupadiri wo mu ntara ya Rumonge wapfuye ku wa kabiri w’icyumweru gishize. Ubwo yashyingurwaga, abari ku itabaro bose bategetswe kwirinda Covid-19 n’ubwo Leta itigeze itangaza ko ariyo yamuhitanye. Gusa abo bakoranaga n’inshuti ze za hafi bari babyiboneye kwa muganga ko ari Coronavirus yamwivuganye.
Hashize igihe kuva u Burundi bwirukanye abakozi bane ba ONU mu ishami ryayo ryita ku buzima OMS harimo uwari uhagarariye OMS mu Burundi, Walter Kazadi Mulombo aho amakuru ahari yemeza ko aba bakozi bazize ko bemeje ko Leta y’Uburundi itangaza amakuru atari yo ku ndwara ya Coronavirus.
Abatari bake bavuga ko abategetsi b’Uburundi bafashe Coronavirus nk’ibisanzwe kandi ikomeje kwivugana abenegihugu.
Mu minsi mike ishize uwayoboraga igihugu cy’uBurundi Perezida Pierre Nkurunziza yapfuye bitunguranye bivugwa ko yazize guhagarara k’umutima, n’ubwo n’ubusanzwe nta muntu upfa ngo umutima ukomeze ukore. Ariko abandi bakavuga ko yaba yarazize Coronavirus kuko umugore we icyo gihe yari muri Kenya aho byavugwaga ko ari kwivuza iyi ndwara.
