Muri Amerika abantu bagera kuri batandatu barashwe barakomereka, nyuma yo kurenga ku mabwiriza yatanzwe na Leta avuga ko abantu bagomba kuguma mu ngo zabo mu kwirinda ikwirakwira rya coronavirus. Polisi ya leta ya California yatangaje ko barashwe ubwo bari mu birori birimo abantu benshi kandi bibujijwe. Gusa ntabwo barashwe na Polisi.
Aba bantu barashwe kuwa gatandatu nijoro ubwo bari mu birori ku nzu zo guturamo (apartment) ahitwa Bakersfield. Abarashwe ni abagore bane, umugabo umwe n’umukobwa umwe – bakaba baravuwe ibikomere bidakomeye cyane.
Nta muntu wafashwe ngo afungwe, gusa abagabo bane babonywe bahunga n’imodoka bikekwa ko ari bo bakoze iki gitero. Hari gukorwa iperereza nk’uko polisi yaho ibitangaza
Mu kwezi gushize, muri leta ya California hashyizweho amabwiriza abuza abantu kuva mu ngo zabo.
Iyi ni imwe muri leta zibasiwe cyane na coronavirus muri Amerika aho abantu barenga 21,000 bayanduye naho 651 ikaba imaze kubahitana.
Mu mategeko mashya, abatuye muri iyi leta bemerewe gusohoka gusa bagiye guhaha, kwivuza, gukora siporo cyangwa kugendesha imbwa zabo n’amaguru.
Ibikorwa byose byarafunzwe hemererwa ibikenerwa cyane nk’ubucuruzi bw’ibiribwa, ubw’imiti n’abacuruza Lisansi n’bindi bijyanye nayo.
Umwanditsi
