Nyuma y’uko Madagascar ivumbuye umuti wa Coronavirus(Covid-19) ukozwe mu bimera OMS ikayamaganira kure, ubu noneho Perezida wa Madagascar yatangaje ko iki gihugu kigiye gutangira kugerageza urukingo rwa coronavirus rukoze mu cyatsi cya artemisia.
Perezida wa Madagascar Andry Rajoelina yavuze ko igerageza ry’urukingo rwa Coronavirus rizatangira mu cyumweru gitaha.
Ku wa mbere taliki 20 Mata 2020, Perezida wa Madagascar Andry Rajoelina yatangaje ku mugaragaro umuti wa coronavirus ukozwe mu bimera ariko bidatinze Ishami ry’Umuryango wabibumbye ryita ku buzima OMS/WHO ryateye utwatsi uwo muti, aho OMS yavugaga ko nta bushakashatsi bwimbitse bwakozwe n’inzobere kugira ngo hemezwe niba koko uwo muti wa Madagascar wavura Coronavirus.
Gusa n’ubwo OMS yavuze ko nta bushakashatsi bwakozwe ngo harebwe niba uwo muti wa Madagascari ukora, nta nubwo OMS yigeze yerura ngo ivuge ko uyu muti wa Madagascar utavura Coronavirus. Ibi ahanini wanasanga ari nabyo bishingirwaho nabaperezida benshi ba Afurika bavuga ko bizeye uyu muti wa Madagascar ndetse bakaba baranawutumije.
Kugeza ubu ibihugu byinshi byo ku mugabane w’Afurika bimaze gutumiza uyu muti wa Madagascar ngo biwukoreshe. Urugero ni nka Congo Brazzaville,Senegal, RDC, Guinee Bisau, Comoros na Tanzania aho abayobozi b’ibyo bihugu bemeza ko bamaze kuvugana na Perezida wa Madagascar mu rwego rwo kugirango harebwe uko uwo muti nabo wabageraho.
Kugeza ubu OMS ivuga ko itaremera “uburyo ubwo aribwo bwose bwo kwivura hakoreshejwe imiti iyo ariyo yose…mu gukingira cyangwa kuvura Covid-19”.
Umwanditsi
