Minisiteri y’ubuzima yatangaje ko hari umurwayi w’imyaka 24 wishwe na coronavirus, ivuga ko yari umupolisikazi wari mu butumwa bw’akazi mu mahanga aho yayanduriye akazanwa mu Rwanda arembye.
Mu mibare yatangajwe mu Rwanda habonetse abanduye bashya barindwi(7) n’abakize barindwi, abanduye bose hamwe bamaze kuba 384 mu gihe abayikize ari 269 naho abo yishe ni babiri.
Uyu mupolisikazi w’ipeti rito mu gipolisi cy’u Rwanda yari mu butumwa muri Sudan y’Epfo mu mujyi wa Malakal, umujyi wa kabiri nyuma y’umurwa mukuru Juba.
Umwe mu bapolisi bari kumwe nawe mu butumwa yabwiye BBC dukesha iyi nkuru ko uyu mukobwa yari mu bakora akazi ko kwita kuri bagenzi be, ko yari mu itsinda riheruka kujya mu butumwa bw’amahoro mu mezi ashize.
Uyu mupolisikazi yari mu kiciro cy’abapolisi n’ingabo b’u Rwanda bari muri Sudani y’Epfo bazwi nka RWAFPU-1 mu butumwa bwa UNMISS. Yari amaze igihe kirenga icyumweru agejejwe mu Rwanda.
Yabaye umuntu wa kabiri wishwe na Covid-19 mu Rwanda nyuma ya Hassan Gisaka wishwe n’iki cyorezo muri weekend ishize.
Ku isi, coronavirus imaze kwandura abantu miliyoni 6,4 abamaze kuyikira ni miliyoni 3 mu gihe abo imaze kwica ari 382,479 nk’uko bivugwa na kaminuza y’ubushakashatsi ya Johns Hopkins.
Muri Sudani y’epfo abanduye bariyongereye mu gihe gito gishize ubu bageze kuri 994 mu gihe imaze kwica abantu 10.
BBC
Umwanditsi
