Kuri uyu wa gatandatu tariki ya 23 Ukwakira 2021, nibwo APR FC yakinaga umukino wo kwishyura w’ijonjora rya kabiri muri Caf champions league, mu mukino wabereye i Monastir kuri Stade Mustapha Ben Jennet, aho yakinaga na Etoile Sportif du Sahel, umukino warangiye itsinzwe ibitego 4-0.
Uko byagenze mu ncamacye!
Ku munota wa 19 Y. Chikhaoui yafunguye amazamu ku ikosa ryo gukora umupira mu rubuga rw’amahina, umusifuzi atanga penaliti, igitego kiba kirinjiye, ari nako igice cya mbere cyarangiye.
Igice cya kabiri cyaje kuba kibi cyane kuri APR FC, yagendaga ikora amakosa menshi ku munota wa 47 bavuye mu karuhuko Y. Chikhaoui atsinda igitego cye cya kabiri biba 2-0.
Mu gihe myugariro wayo Niyomugabo Claude yahawe ikarita y’umuhondo ya kabiri imubyarira umutuku, ubundi ibitego birisukiranya kuri iyi kipe y’ingabo z’igihugu.
APR FC yari isigaranye abakinnyi 10 mu kibuga, mu minota ya nyuma yakoze ikosa mu rubuga rw’amahina, hatangwa Penaliti, maze Mohamed Al-Dhaawi ayinjiza neza cyane, kuko umunyezamu Ishimwe Jean Pierre yajyiye ku ruhande rumwe umupira ujya mu rundi, biba 3-0.
Bidatinze ku munota wa nyuma Ali Soumah yatsinze igitego cy’agashinguracumu biba 4-0. Urugendo rwa APR FC muri Champions League ruba rurangiriye aho itsinzwe ibitego 5-1 mu mikino yombi.
APR FC irahita imanuka mu mikino ya Caf Confederations Cup aho iyo bizakina izatangazwa mu minsi mike.
Umwanditsi
