Minisiteri y’Ubuzima mu Rwanda yatangaje ko hari bamwe mu bakingiwe COVID-19 basuzumye nyuma yo gukingirwa bakabasangamo ubwandu bw’icyo cyorezo, iyi ikaba ari yo mpamvu abantu bose basabwa gukomeza kwitwararika na nyuma yo gukingirwa.
Abinyujije ku rukuta rwe rwa Twitter Umuyobozi w’ikigo cy’igihugu gishinzwe ubuzima RBC Dr Nsanzimana Sabin yavuze ko mu bipimo bimaze iminsi bifatwa hasanzwemo abantu 400 banduye kandi barakingiwe.
Yagize ati: “Mu bipimo tumaze iminsi dufata, hagaragaye abantu 400 banduye kandi baramaze gukingirwa. Abakingiwe ntibagomba kwirara bumva ko gukingirwa bikuraho kwandura no kwanduza abandi.”
Umuyobozi wa RBC kandi avuga ko ubwandu bushya bwa COVID-19 bwazamutse ku kigero cya 245% mu gihe kitarenze ibyumweru bibiri, naho abantu babuze ubuzima biyongereye ku kigero cya 25%, mu gihe abakenera ibitanda kwa muganga umubare wazamutse hejuru ya 70%.
Uko kuzamuka kw’imibare mishya y’abandura icyorezo cya Covid-19 kwatumye Minisiteri y’Ubuzima yongera gufungura ibigo byita ku barwayi ba Covid-19 byari byarafunzwe kugira ngo bishobore kwita ku barembye, Aho kujyeza ubu Ibitaro bya Nyarugenge bifite ibitanda 100 ndetse umubare w’ababigana ukaba ukomeje kwiyongera, hakaba hari na gahunda yo kongera gufungura ibitaro bya Kanyinya na Gatenga byari byarafunzwe.
Minisiteri y’Ubuzima mu Rwanda igaragaza ko kwiyongera k’ubwandu bwa Covid-19 mu Rwanda byatewe n’urujya n’uruza rw’abantu rwaturutse ku iruka ry’ikirunga cya Nyiragongo, ndetse na bamwe mu banyarwanda babaga cyangwa bakorera mu gihugu cya Uganda, ingamba zakazwa muri icyo gihugu bagahitamo kwitahira bakaza banduye ari nako banduza bagenzi babo basanze.
Umwanditsi
